L'eco di Seunis 2010

Dae unu cantu antigu pensamentos de oe

Sos Gosos a Nostra Segnora de Seunis de Pietrinu Murru

 

Si dimandamus a unu cale si siat pitzinnu de iscola si connoschet carchi poeta, in vida, capatze de iscrìere unu cantu in lode de unu santu o de Nostra Segnora, pagos meda an a arrivire a fàghere nessi unu nòmene. Ite cheret nàrrere custu? Cheret nàrrere primmu de totu chi sos poetas, si creet chi sien totu mortos e chi sas abilidades de sa zente, e de sa bidda, forsis, non sun tentas bastante in contu.

Sos Gosos sun una traditzione antiga ma chi sighit ancora: custu cumponimentu nou nos giughet deretos a pensare subra su poite, a dies de oe, un’òmine potat iscrìere una làude a Nostra Segnora.

Oramai totu, chie pius chie mancu, che semus intro de s’era tecnologica, che semus intro sa “rete”, che semus, in mamentu, in cale si siat parte de su mundu, bastat unu “clic”. Non b’at pius frontieras, amus totu a dispositzione e amus delegadu a sa “tecnica” finas sas relatas intre òmines. Como b’est su web, amus sas mail, sos sms, b’est facebook, e gai sighende. Totu custu andat bene meda, ca sun totu cosas de importu, chi nos agiuan in milli modos, chi nos servin e nos faghen puru risprammiare tempus. Sa dimanda de fàghere est però: it’amus sacrificadu? Como chi amus totu custos àgios, istamus mezus? Est mezorada sa tratàntzia cun sos àteros? 

In custos tempos inue totu, in totu su mundu, semus diventende che pare (a dolu mannu), inue totu comporamus sas matessi cosas, semus bestidos a sa matessi manera, assazamus sos matessi mànigos, abbaidamus e iscultamus sas matessi cosas, forsis faeddare de nois, dare valore a su connotu nostru e a sas diferèntzias, est sa manera pius dèghile pro muntènnere una identidade distinta e pro non ch’ingullire, chentza mastigadas e digeridas, sas cosas chi enin dae fora.

Sas abilidades nostras benin dae tesu meda, inoghe pensamus solu a sa poesia ma si podet pensare puru a totu su fàghere e a s’ischire de unu pòpulu, dae su cantu a su ballu, dae sas artes de sos mannos a sos tribàglios antigos. Suta su fàghere de ogni die, b’est semper istadu su fàghere umpare a sos àteros, s’abbaidàresi in cara, su cumprendere su sentidu de sa bidda, de sa zente, su de si cunfrontare e cunfidare apare.

Tiu Pietrinu est un’òmine mannu, classe 1925, un’òmine ch’at connotu tempos malos e bonos, chi at proadu e vìvidu sas dificultades de sos annos in mesu de sas gherras, chi at imparadu dae sos mannos s’arte de s’arrangiare e de agualare sa vida a sos tempos. At connotu tempos inue sa bidda fit bona a cuncurrere a pesare sos minores, a ammunestare su malu fàghere de chie ch’essiat a fora de sas règulas, ma puru agiuare chie s’agataiat in dificultade. Dae sos mannos tiu Pietrinu at imparadu puru a poetare, a impitare sa limba, su cantu, sa poesia pro nàrrere su chi pensat.

Inoghe pagu importat sentensciare: bi podet èssere chie aprètziat su ch’iscriet e chie no, chie no est de acordu e chie emmo e chie aiat àpidu fatu divesciamente; inoghe nos interessat pius a prestu de pònnere custas parìtzas dimandas: it’at de nos nàrrere tiu Pietrinu? Si li faghimus lègere sas poesias suas, como custos Gosos chi nos at istrinadu, unu pitzinnu ch’est in iscola podet imparare carchi cosa? In cantos oe semus bonos a ch’intregare una pregadoria a Nostra Segnora impitende sos versos pro nàrrere su chi pensamus de sa vida, de sa fàmilia, de su tràbagliu, de sos afetos e de sos tempos? Cales sun sos mèdios ch’impitamus pro intrare, cun umilidade, a intro de sa bidda? Bi semus bonos a abèrrere, e a muntènnere, unu cunfrontu profundu cun sos àteros, de nos pònnere in giogu e a su vàgliu de su giudìsciu anzenu? Ite faghimus pro immanniare su sensu de apartenèntzia, nostru e anzenu, a sa comunidade?

Legende custa poesia nde poden bessire a pizu pensamentos chi nos agiuan, pro primmu, a nos pònnere custas dimandas, ma puru a agatare carchi risposta.

Gosos pro Nostra Segnora de Seunis si nd’agatat meda, dae s’istiga de sos pius antigos a cussos de tiu Totoi Palita a sos de Giuanne Biosa (de Bonorva). Nos piaghet de pensare chi custos sian sos primos de un’isalada manna de làudes noas.

 

Martu de su 2010                                                                                    Stefano Ruiu

 

 

 

SOS GOSOS DE NOSTRA SEGNORA DE SEUNIS

 

 

 

Maria, mama e isposa

de su Babbu Soberanu,

dannos a totu sa manu,

Mama de chelu Gloriosa.

 

A sa terra su Criadore

sende fiza T’at mandadu,

mama digna as generadu

a Gesusu Redentore,

pro redimer su pecadore

in custa terra ispinosa.

Dannos a totu sa manu,

Mama de chelu Gloriosa.

 

In Tiesi fortunada

at sa nobile dimora,

ses mama protetora,

dae totu ses invocada.

In sa grascia dimandada,

nos assistis generosa.

Dannos …

 

De su chelu s’altu tronu,

sa suprema autoridade,

da’ sa bona voluntade

a su terrenu padronu,

pro torrare tempus bonu

a sa zente bisonzosa.

Dannos …..

 

Curregi dae Paradisu

s’idea ‘e s’umanidade,

po s’istimare ogni frade,

su tribagliu ‘ene divisu,

torra allegru su risu

de s’isposu e-i s’isposa.

Dannos …...

 

Serenu e onoradu

campet su trabagliadore,

totucantu su suore

siat bene cumpensadu,

su pane asseguradu

a sa familia numerosa.

Dannos …..

 

Cun sos ojos amorosos

cummove s’Onnipotente,

chi fetat bona sa zente

che frades afetuosos.

Si dividan generosos

cun s’afetu, d-ogni cosa.

              Dannos ….

 

Torra, Mama Soberana

s’unione familiare,

totu unidos pro amare

sa famìlia cristiana,

vivende pius umana

s’unione amorosa.

Dannos …..

 

Massaios e pastores

bidan tempos fortunados,

torren bonos sos marcados

a sos imprendidores,

artigianos, costrutores

sigan sa vida operosa.

               Dannos…..

 

Apaga s’isperantzia

a su malaidu sufrende

e a su chi est pianghende

de sa culpa sa mancantzia,

s’at pecadu in s’ignorantzia,

s’est sa pena dubbiosa.

Dannos …...

 

Ses sa nostra protetora

de sa ‘idda tiesina,

de su chelu sa Reina

pregamus a Nostra Segnora:

acoglinos in s’ultim’ora

clemente e piedosa.

 

Dannos a totu sa manu,

Mama de chelu Gloriosa.

 

 

 

Pietrinu Murru.

Bighinu de Nostra Segnora

 

Thiesi su 5 de bennarzu 2010