L'eco di Seunis - Gosos

Sos istranzos puru laudaian a Nostra Segnora de Seunis:

sos Gosos de su 1912 de Giuanne Biosa de Bonorva

 

Sas “làudes sacras”, chi si cantan ancora oe in biddas medas, in Sardigna si connoschen cun una paràula chi nos amus prestadu dae su castiglianu: Gosos (Gozo: gioia, allegrezza) pro su logudoresu, Goççus, Goggius pro su campidanesu (dae su catalanu goigs) e Grobbes impitadu in paritzas biddas de su nuoresu (dae su catalanu cobla), e faghen parte de cuddu gènere literàriu chi regogliet sos innos sacros. Pro àere mazores e pius fundadas notìtzias subra sos Gosos, pius de totu pro su chi pertocat a Thiesi, bos cumbidamus a leger s’artìculu de G. Chesseddu publicadu in custa matessi rivista in su primu nùmeru de cabidanni de su 2008.

Como amus pensadu de nde imprentare àteros de gosos pro Nostra Segnora de Seunischi oe sun bell’e pagu connotos. Custos Gosos sun istados iscritos dae unu poeta bonorvesu chi si naraiat Giuanne Biosa e si poden agatare in sa biblioteca universitària de Tàtari, istampados in unu fògliu a sa sola. Cun meda probabilidade sun istados iscritos in sos primos degh’annos de su ‘900 ca, in unu timbru chi s’agatat subra su fògliu, chi serviat pro sinnare s’intrada de sa poesia in biblioteca, si b’agatat s’annu 1912.

Gai, comente sa mazore parte de sos Gosos connotos in Sardigna, custos puru de G. Biosa, si presentan in istrofas de versos otonàrios. Sa prima cuartina (chi faghet de istèrrida) est sighida dae sestinas, in unu nùmeru chi andat dae sas noe a sas deghesete, in custu casu sun treighi. S’ischema mètricu de sas cuartinas est: ABBA mentres su de sas sestinas est ABBAAX, inue X, sestu versu de s’istrofa, rimat guasi sempre cun su de ses versos de tutu sas àteras sestinas ma puru cun su primu e su de bator de sa cuartina de comintzu. Pro un possìbile isbàgliu tipogràficu non s’agatat su de ses versos de sa prima sestina.

Stefano Ruiu

 

 

Gosos de Nostra Segnora de Seunis

(de Giuanne Biosa de Bonorva - 1912)

 

Alta reina sagrada

de chelu e terra armonia,

prega pro nois Maria

de Seunis intitulada.

 

Prima de su naschimentu

dae Deus destinada

magine in chelu formada

pro lughe in su firmamentu

su paradisu as cuntentu.

Prega pro nois Maria

de Seunis intitulada.

 

Chentza mancia cuntzepida

pius pura e tantu neta,

magine sa pius perfeta

dae Deus elegida,

sa tua vera naschida

dae su chelu est falada.

Prega …….

 

Dae su chelu falesit

a su mundu pro allegria,

mama a su veru Messia

de su verbu ch’incarnesit,

s’Anghelu l’annuntziesit

prontamente s’imbasciada.

Prega …..

 

De sa naschida ecellente

sa ‘e su verbu Divinu,

in cussu logu mischinu

nascheit s’Onnipotente,

altzat s’istella d’Oriente

in cudd’ora destinada.

Prega …..

 

Sende movende s’istella

naschet su veru Messia

cun Zusepe in cumpagnia

e Maria Virginella ,

infinita e tantu bella

de risplendore ghia.

Prega …...

 

A mesanote de Nadale

naschesit su Redentore,

e ghiat a sos pastores

sa naschida generale,

cun sonos celestiale(s)

cun melodia sagrada.

Prega …..

 

De Seunis luminosa

tenet su titulu veru,

de miraculu sintzeru

fatesit mama amorosa,

de gratzias bundantziosa

chi su mundu nos at dadu.

Prega …...

 

De miraculos videntes

ch’a d-ognora nde faghides,

a Issa totu amitides

pro l’osservare presente,

cun su coro e cun sa mente

ti pregamus pro avocada.

Prega ….

 

In custa terra pro sorte

ses bennida pro istare,

ti potemus laudare

in cudda eterna sorte,

in cudd’ora de sa morte

t’at Seunis preparadu.

Prega ….

 

In custu logu diciosu

ti ses cherfida frimmare,

sas chi ti tene abitare

pro d-ognunu est fortunosu

chi pro misteriu dignosu,

custa terra est signalada.

Prega ….

 

In custu logu formesit

custa Eclesia Santa,

sa tua armonia tanta

inoghe la riservesit

e beneita restesit

custa terra fortunada.

Prega ……

 

Funtana bundantziosa

suave pius ecellente,

Mama de s’Onnipotente

divina mistica rosa,

ses vera meighinosa

de ogni prima sanada.

Prega ….

 

O Virgine de piedade

de clementzia e amore,

cuddu tremendu rigore

de fizu ‘ostru bracade,

su paradisu nos dade

in s’ultima retirada.

 

Prega pro nois Maria

de Seunis intitulada.