NUINA DE NOSTRA SEGNORA DE SEUNIS

NUINA DE NOSTRA SEGNORA DE SEUNIS

 

ORASSIONE I^ DIARIA

Deus e Segnore meu, prostradu addaenantis de sa majestade Bostra soberana, cun totu su

èssere meu, ànima e coro, Bos adoro, cunfesso e beneigo, làudo e glorìfico, a Bois reconnosco pro su Deus e Segnore meu, in Bois creo, e creo firmamente in totu sos mistèrios de sa Santa Fide catòlica in sa cale cherzo vìvere e mòrrere.

In Bois cunfido, e dae Bois aiseto mi tezis perdonare sos pecados mios, mi tezis dare sa grascia Bostra, sa perseveràntzia in issa, e sa glòria chi azis promìtida a sos chi persèveran in su santu amore Bostru. A Bois amo subra totu sas cosas pro sa bonidade Bostra infinida, a Bois grascias infinidas pro totu sos benefìtzios chi mi azis fatu e istades fatèndemi sempre.

A Bois cunfesso sa summa ingratitùdine mia, e totu sas gulpas e sos pecados mios, e de totu Bos pedo perdonu. Mi pesat ancora proite sezis su Deus meu infinidamente bonu e dignu de èssere amadu subra totu sas cosas; proponzo fermamente, assistidu cun sa grascia Bostra, de mai più pecare e fuire dae totu sas ocasiones de Bos ofèndere, cunfessàremi e fàghere penitèntzia de sos pecados mios e procurare in totu de servireBos e agradareBos. Cunfido in Bois Segnore, chi pro s’infinida miserigòrdia Bostra mi tezis perdonare e mi tezis dare sos agiudos Bostros proite, perseverende in sa grascia Bostra, godimus eternamente in sa glòria. Perdonademi Segnore pro chi cun s’ànima lìmpia e pura, invoche e laude a Maria Santìssima, Mama Bostra e Segnora mia, e acanse pro sa intertzessione sua, cantu in custa novena pedo, essende pro mazore onore e glòria Bostra e profetu de s’ànima mia.

Amen

(si faghet sa Cunsiderassione de sa die)

 

 

  ORASSIONE II^ DIARIA 

Vìrgine gloriosìssima e clementìssima Mama de Deus Maria, acò prostrados a sos santìssimos

pees Bostros,  nois ùmiles teracos Bostros, indignos divotos Bostros; Bos pregamus dae su pius prufundu de su coro nostru, a Bos dignare de retzire custas dèbiles làudes e beneisciones nostras chi Bos oferimus in custa Santa Novena cunsagrada a su felice mamentu de su santìssimu Naschimentu Bostru in su mundu, intendende de las acumpagnare a-i cuddos fervorosos càntigos chi Bos donan sos ànghelos e santos in su chelu.

In prèmiu de tantu, Bos suplicamus, de nos otènnere sa grascia chi, comente Bois naschezis in custu mundu pro èssere sa Mama de Deus, gai nois resuscitemus a sa grascia divina pro èssere fizos Bostros gai chi, amendeBos poi de Deus pius de ogni cosa criada e servendeBos cun tota fidelidade in terra, potemus bènnere una die a Bos laudare pro sempre in su chelu.

 

E pro como permitide, o grande avocada nostra, chi Bos veneremus e invochemus cun su saludu de s’Arcangelu Grabielle pro sa devota memòria de sas dughentasetanta dies chi istezis inserrada in su sinu fortunadu de sa Mama Bostra Sant’Anna.

Siat edducas beneitu o Maria, cuddu felitzissimus mamentu ch’istezis cuntzeta chentza mància originale.

 

 

  I^ DIE

Trinta de Austu

 Cunsiderassione

 

Cunsideremus, cristianos divotos de Maria, su privilègiu singulare a Issa cuntzèdidu finas dae su primu mamentu de sa gloriosa nàschida sua: sa naturale inclinatzione a su male, sa ribellione imperiosa de sa carre, su disordine de sos contumaces afetos, chi sun s’infelice eredidade de ogni òmine, no apesin parte peruna cun custa fiza privilegiada de su chelu, ne potesin in tempus perunu oscura rèndere sa puresa illibada.

Naschesit Maria tota grata a s’Altìssimu, tota perfeta e santa. Nois, est beru, nàschidos in pecadu e fizos de sa vindita divina. Ma Deus pro sa miserigòrdia sua, nos rigènerat a una vida noa cun su bagnu saludare de su Batijmu, intreghèndenos e bestèndenos de sa candidissima istola de innotzèntzia e santidade. Guai a nois però chi perdemis custa bella istola e mancemis apena nde istemis capatzes.

Eperò arrepentidos e cuntridos recurrimus a Bois, o grande Mama e Avocada nostra Maria, proite nos imploredas sa grascia de burrare cun d-una vera penitèntzia totu sos pecados nostros e perseverare in issa finas a sa fine de sa vida, umilmente suplichendeBos:

Deus Ti salvet Reina...

 

 

  II^ DIE

31 de Austu

Cunsiderassione

 

Cunsideremus, cristianos divotos de Maria, comente s’ànima de custa privilegiada criatura, destinada pro èssere abitatzione de su Divinu Salvadore, istesit sùbitu adornada e difesa comente sa tzitade de Sionne, in sa cale figurat de sas pius sòlidas e luminosas virtudes. Sa Fide isvelesit a sa mente Sua sa sublimidade de sos mistèrios celestes. S’Isperàntzia ispieghesit puru a su dòcile ispìritu sou, sa fidelidade immancàbile de sas promissas divinas da ue si congiunghesit a tantu benefatore e pregamus cun su pius vivu trasportu de s’ànima pro non lu lassare mai pius.

Nois, est beru, naschemis in sas tenebras de sa comune ignoràntzia cun s’inclinatzione fatale a sos mundanos piagheres, però istesit pronta sa Fide, a nos incaminare a s’eterna veridade; pronta s’Isperàntziacristiana a nos fàghere connòschere sa vanidade de ogni bene terrenu, pro nos fàghere aspirare a sos benes immortales. Ma nois, o ismentighende, o male cunservende gasie bellas virtudes, creschemus pius prestu in sa malìscia de su pecadu chi no in sa cognitzione de sos santos mistèrios, e preferimis sa soddisfassione de unu piaghere vilìssimu a s’acuistu de su Paradisu. Deh! O grande Mama e Avocada nostra, otenidenos prontamente dae sa Divina Liberale Miserigòrdia una fide tota operosa, una isperàntzia tota celeste, umilmente suplichèndebos:

Deus Ti salvet Reina...

 

      III^ DIE

1 de Cabidanni

Cunsiderassione

 

Cunsideremus, cristianos divotos de Maria, comente su purìssimu coro Sou, s’incontresit sùbitu surpresu dae incèndiu de amore chi cantu pius in issa dilataiat s’ardore, tantu pius nde apagaiat sos afetos. Custu coro istesit s’altare mìsticu inue s’atzendesit chentza mai istudaresit, su fogu de su divinu amore, inue oferiat Maria sos pius pretziosos olocàustos. Deus amabilissimu! Bois nos cumandades de Bos amare cun tota sa mente, cun totu su coro, cun tota s’ànima nostra, e Bois matessi nos dades totu cuddu chi cun tota rejone nos cumandades. E poi tian passare dies intreas chentza chi nois cunsagremus a Bois unu pensamentu de amore, cun afetu de teneresa, unu disizu de devotzione.

Comente podimus àere coro de nàrrere chi Bos amamus totalmente cantu est de parte nostra! Deh! O Mama santìssima, otenidenos cuddu amore fervorosu e costante, chi currispondesit a su Summu Bene finas dae sos primos mamentos de sa vida, benzat intro de nois, o Mama carìssima, cuddu fogu divinu chi consumit e atzendet, chi distruit in nois ogni pensamentu de ammissione, ogni afetu de mundu, ogni disizu carrale e, in càmbiu, si formet in nois cuddu amore immaculadu chi sempre chircat, sempre cumpiaghet, sempre disizat a Deus, e gasie o Segnora e Avocada nostra, Bos suplicamus umilmente nende:

Deus Ti salvet Reina...

 

   IV^ DIE

2 de Cabidanni

Cunsiderassione

 

Cunsideremus, cristianos divotos de Maria, comente custa amante Segnora cun cuddu perfetu connoschimentu chi apesit finas dae su naschimentu sou, fatesit sùbitu a Deus unu generosu e totale sacrifìtziu de Issa matessi, cunsagrende a Issu in particulare sa puresa de su virginale corpus Sou e s’umilidade de unu coro dòtzile e mansuetu. Custu istesit su mèdiu pro meritare dae s’Altìssimu de èssere prevènnida dae s’Ispìritu Santu, e preparare in Issa una digna abitatzione a su Salvadore de su mundu.

Oh! E cantu piaghen a Deus sas primas ofertas de unu coro innotzente, chi sun sas primìtzias de sa grascia. Ma, e cantos de nois, in logu de ofèrere a Deus sos primos frutos de s’innotzèntzia nostra, formemis dae sos primos annos de s’usu de sa rejone unu muru de divisione cun su Criadore e Benefatore nostru soberanu, vivende in sa infame isciatùdine de s’inimigu infernale, e a-i custu superbu Lutzìferu sacrifichende sos guastos afetos cun tanta ingiùria de su Babbu nostru celeste. Oh ingratitudine! Oh istòlida vida! Deh! Bois, o Maria Mama de piedade e rifùgiu de sos pecadores, imploradenos pro sos mèritos Bostros, chi tenzemus unu coro arrepentidu, postu chi l’amus pèrdidu innotzente, e-i custu sacrifìtziu de unu coro contridu e umiliadu tet èssere a Deus atzetu e agradessidu, chi gasie o Segnora e Avocada nostra, Bos suplicamus fevorosamente nende:

Deus Ti salvet Reina...

 

  V^ DIE

3 de Cabidanni

Cunsiderassione

 

Ispijemunos, o cristianos divotos de Maria, in cudda pronta e assoluta currispondèntzia de custa Vìrgine umilìssima a sa grascia divina chi la prevenzesit. Comente Issa inter sos donos de s’Ispìritu Santu chi perfetamente l’adornesin, elegesit a preferèntzia cuddu de su santu timore, chi est su veru fundamentu de sa vera sapièntzia e de sa grande sièntzia de sos santos, e-i s’alimentu de sas virtudes pius caras a su chelu. Pro pius chi esserat sa bella ànima sua cunfrimmada in sa grascia, e immune totalmente dae sa batàglia de sas immundas e bàscias inclinassiones, si proponzesit nientemancu una tale lontanàntzia dae sos ogetos contagiosos de su mundu, chi giompesit finas a timire sa vista de un’ Ànghelu. E nois chi tenimus sos tesoros de sa grascia intro de unu èssere fragilìssimu, chi tenimus tantu fàtziles e inclinados a su malu sos sentidos de su corpu, e sas potèntzias de s’ànima, dispressiamus cuddu saludare timore chi nos tiat servire de reparu pro non nos esporrere a-i cuddas voluntàrias ocasiones, a-i cuddos mundanos tratenimentos, inue perìgulat sa virtude, e si dat sa morte a s’ànima; cun cussu timore timis servire a Deus cun tota fidelidade osservende in d-ogni parte sos adoràbiles cumandamentos suos, e guardendenos de l’ofèndere.

Bois edducas, o grande Avocada nostra chi timezis tantu santamente a Deus, impetradenos dae su celeste Isposu Bostru unu donu tantu pretziosu pro bene cunservare su tesoro de sa divina grascia; chi gasie o Segnora Bos suplicamus umilmente nende:

Deus Ti salve Reina...

 

   VI^ DIE

4 de Cabidanni

Cunsiderassione

 

Rifletemus in custa die, Cristianos divotos de Maria, comente custa purìssima Vìrgine, cun sa nàschida sua annuntziesit a totu sos mortales, sa paghe e-i s’allegria. Mustresit aprobe de bènnere a su mundu, su sole luminosu de giustìscia e santidade, signalesit su portu de salvatzione, sigillesit su patu de grascia, chi su Re de sa paghe fit prontu a istabilire inter sos òmines e Deus, tra su chelu e-i sa terra. E nois, comente sentimus in coro custa paghe e-i custa santa allegria annuntziada dai custa gloriosa Redentora?

Forsis cun vìvere trancuillos in mesu de sos disòrdines e pecados e non proende rimordimentu in sa trasgressione contìnua de sos divinos cumandos!

Ah! Nois infelices! Custa apuntu est sa paghe funesta e-i sa fatale allegria chi Deus lassat pro castigu a sos pecadores ostinados. Sa paghe chi annuntziesit Maria est cudda matessi chi su Beneitu Fizu sou cunfirmesit naschende e lassesit in donu e testamentu a sos caros discìpulos suos. Paghe contrària a cudda de su mundu, paghe de sa cale gosan cuddos solamente chi cumplin sa divina voluntade.

Mama Santìssima deh! Faghide cun su patrotzìniu Bostru, chi potemus connòschere s’istadu misèrabile chi vivimus e-i su Deus de ogni consolatzione benzat a su coro nostru e in cumpagnia sua nos batat cudda allegria, cudda paghe chi non si connoschet dae sos seguaces de su mundu e Bos lu suplicamus vivamente nende:

Deus Ti salvet Reina...

 

    VII^ DIE

5 de Cabidanni

Cunsiderassione

 

Ammiremus, cristianos divotos de Maria, sa potèntzia soberana chi custa privilegiada criatura apenas nàschida esertzitesit subra s’inimigu infernale. Una Giudita chi trunchesit sa conca a s’atrividu Oloferne, una Debora chi ponzesit in fua sos Filisteos, un’Ester chi liberesit su populu sou dae sa crudelidade de Ammannu, figuresin sos luminosos triunfos Suos. Eligida dae su chelu pro castigare s’ingannu de s’infernale, s’insidiosu serpente, nde aterresit, ancora pitzinna, sa conca velenosa e si mustresit terribile a totu sas potèntzias de s’Inferru. Vìrgine amabilìssima! Nois semus d-ogni mamentu in bataglia cun custu serpente malignu, chi tratat e rigirat de predare s’ànima nostra, como cun s’astùtzia, como cun cussas pius violentas insìdias. E in logu de nos fortificare e parare robustos cun sa potèntzia de sa grascia divina, tzedimus in sas tentatziones e, cale àtera infelice Eva, nde sighimus sas pèrfidas lusingas, nde tragamus su velenu.

Benide o grande Vìrgine Maria, benide in difesa nostra, chi giuramus una gherra implacàbile dai como innantis a-i custu inimigu de Deus e nostru: otenidenos pro bìnchere, sas armas netzessàrias dae su chelu, sa Fide, s’Isperàntzia, sa Caridade, s’orrore de su pecadu, e fuire sas ocasiones; e avalorados dae su patrotzìniu Bostru, temus riparare sas ruinas nostras; chi gasie, o Segnora e Avocada nostra, bos lu suplicamus umilmente nende:

Deus Ti salvet Reina...

 

  VIII^ DIE

6 de Cabidanni

Cunsiderassione

 

Cunsiderade, cristianos divotos de Maria, sa grandesa gloriosa chi esaltesit custa  primogènita de su chelu, subra de ogni àtera creatura sugeta a s’Altìssimu. Custa grandesa no istesit già  terrena e mundana, ma Ispirituale e de grascia. Non distinghesit sa Divina Sapièntzia, in Maria, sa reale zenia, sa dignidade de sa tribù, sas impresas de sos antenados, ma benesì s’isplendore de sas virtudes pius che angèlicas chi sa bell’ànima sua adornaian. Tantu est beru chi Deus non zùigat dae sa grandesa, nobilesa e dignidade segundu su custumene de su mundu. Una persona est grande, nobile e digna a sos ojos de Deus, si s’incontrat ùmile, mortificada e giusta. Imparemus o Cristianos, a èssere grandes dae Maria chi, proite si cunsideresit e cunfessesit sa pius ùmile servidora de Deus, meritesit de èssere su pius ricu siddadu de sas grascias celestes, Tèmpiu vivu e Abitatzione de s’Ispìritu Santu, Augustìssima Mama de Deus.

Bois edducas, o Maria Santìssima, consighidenos dae Deus sa grascia de èssere ùmiles a sos ojos nostros e sutamissos a sa divina voluntade; chi tale, narat su divotu Bostru Santu Bernardu, est su cùmulu de sa vera grandesa; e comente lu disizamus, Bos lu pregamus ancora umilmente nende:

Deus Ti salvet Reina...

    IX^ DIE

7 de Cabidanni

Cunsiderassione

 

Cunsideremus, cristianos divotos de Maria, comente sa sublime e privilegiada santitade sua, andesit sempre creschende e aumentende finas a su gloriosu fine sou, cun sa pràtica costante de sas virtudes, sas pius signaladas e distintas. Ogni mamentu de sa vida sua istesit un’aumentu de mèritu, proite ogni mamentu istesit un’esercìtziu de virtude pius perfeta. Epuru Maria Santìssima cunfrimmada in grascia, no aiat ite timire e dubitare de sa salvatzione sua: fit tzerta e segura de l’otènnere e lograre. E nois, chi podimus pèrdere sa prima grascia de adotzione, e chi forsis l’amus già  pèrdida, nois tantu fàtziles a èssere seduidos dae sos ogetos sensìbiles, comente fuimus sas ocasiones perigulosas, comente mortificamus sas passiones nostras, a cale custòdia obligamus sa vista, sa limba e ogni àteru sentidu, pro cunservare sa grascia retzida in sos Sacramentos e pro nos avantzare in d-una santidade chi nos ghiet dae virtude in virtude a sa possessione de Deus. Deh! Ammentèmunos bene chi, in su servìtziu de Deus, su printzipiare bene istesit de medas, però de si salvare istesit sempre de pagos.

Bos pregamus edducas vivamente, o grande isperàntzia nostra, a nos otènnere custa ùltima grascia, sas pius netzessària pro sa eterna salvatzione, chi est sa perseveràntzia in su bene; proite pratichende a imitatzione Bostra chentza interrutzione sas virtudes cristianas, cun fervore sempre nou, siemus istàbiles in sa grascia e salvos in sa glòria e gasi, comente Bos lu pedimus, lu suplicamus umilmente nende:

Deus Ti salvet Reina...

 

 

Deus Ti salvet Reina

 

Deus Ti salvet Reina, Mama de misericòrdia, vida, dultzura e isperàntzia nostra; Deus Ti salvet, a Tie recurrimus nois disterrados fizos de Eva, a Tie suspiramus clamende e pianghende in custa badde de lagrimas; a nois edducas Avocada nostra, mùstranos sos ojos tuos miserigordiosos e, poi de custu esìliu, mùstranos a Gesus Cristu frutu beneitu de sas intragnas Tuas; o Clementìssima, o Piedosa e Dultze Vìrgine Maria, prega pro nois Santa Mama de Deus, a tales chi siemus dignos de sas prommissas de Gesus Cristu.

Amen

 

 

 

Gosos de

Nostra Segnora de Seunis*

 

Serenìssima Aurora

de sos santos melodia

ses de Seunis Maria

de grascias dispensadora.

 

Aurora gloriosa

de sos chelos ornamentu,

in totu mistèriosa

Maria vasu de argentu,

de sos coros fundamentu

de aflitos consoladora.

Ses de Seunis Maria

de grascias dispensadora.

 

In su supremu consizu

de sa divina natura,

risplendes càndidu lizu

pius de ogni criatura,

sende in sa celeste altura

de donos ministradora.

Ses de...

 

Ca ses s’Arca triunfale

circundada de clemèntzia,

su Babbu Celestiale

Ti donesit sa potèntzia,

su Fizu sa sapièntzia,

s’Ispìritu Santu ancora.

Ses de...

 

Sa gerarchia celeste

ti cantan càndida istella,

sa pius pretziosa veste

de sole e luna pius bella,

o rica, o santa donzella

de su mundu protetora.

              Ses de...

 

Sa celeste gerarchia

grandes laudes intonesit

cando Gabriele intresit

saludende :-Ave Maria-.

O lughe, cunsolu e ghia

de s’ànima pecadora.

Ses de...

 

Su chelu, sole e luna

Ti cantan eternamente

e Ti giaman totu in una

Mama de s’Onnipotente,

e cun Cristos giustamente

de males Riparadora.

Ses de...

 

Maria, mare abbundante

de grascias in d-ogni cosa,

Maria sole illustrante

de su chelu pius gloriosa,

Maria candida rosa

de Deus ambasciadora

 Ses de...

 

Già  chi tantu esaltada

pro tantos donos Maria,

tene pro incumandada

cust’illustre cumpagnia,

servinos de lughe e ghia

in vida e in s’ultim’ora.

Ses de Seunis Maria

de grascias dispensadora.

 

*Testo detto  “de Tiu Totoi Palita” 1869-1949) che, con qualche variazione, si canta attualmente

 

 

Gosos de Nostra Segnora de Seunis*    

 

Pecadores chi timides

cristianos chi pecamus

àter'amparu no amus

a Maria recurride.

 

Si gagliardas tentassiones

o sezis isconsolados

pòveros, netzessitados

patides aflissiones

azis tribulassiones

cun Maria bos unide.

Àter'amparu no amus

a Maria recurride.

 

In sos bisonzos e dannos,

in sos perìgulos totu

ognunu preghet divotu

allìviu in sos afannos.

Si sezis in males mannos

a Maria lu pedide.

    Àter'amparu…

 

Si su bàratru infernale

crudele indispetidu

contra a bois atrividu

chircat de bos fagher male

bos defendet liberale

si pro mama La tenide.

    Àter'amparu…

 

Maria ch'est totu amore

cale mama piadosa,

chircat sempre fastizosa

salvare su pecatore:

pregadeLa cun fervore

a Issa bos oferide.

 Àter'amparu…

 

E Bois mama amorosa

consolu de sos afligidos,

totu sos coros unidos

in custa valle penosa

atzetade piadosa

sullevade e favoride.

 Àter'amparu…

 

Sullevade sos aflitos,

sos tìmidos cunfortade,

Bois pro totu pregade

               pro sos comunes delitos,

chi totu sian iscritos

predestinados faghide.

 Àter'amparu…

 

In Bois sa confidàntzia

Vìrgine Santa tenimus

de sos males chi timimus

amus segura isperàntzia

chi perdonu a sas mancàntzias

clemente nos otenide.

   Àter'amparu…

 

A sos pês Bostros Segnora

inoghe fizos divotos

benin a isolvere votos

e Bos ringratzian ancora.

Custu tributu, o Segnora,

de coros gratos reztide.

  Àter'amparu…

 

Cando in s'ultima agonia

est pro falare sa morte,

de Bois agiudu forte

isperat ognunu ebbia

in cussu istante, o Maria,

a nos sucurrer benide.

   Àter'amparu…

 

Bolade a nos difendere

dae s'assaltu timidu

chi s'iferru totu unidu

movet s'ànima a pèrdere,

subre de isse otènnere

vitoria nos cuntzedide.

 Àter'amparu…

 

Grascia tantu invocada

ùmiles Bos dimandamus,

cun su coro bos pregamus

chi issa siat acansada

gai s'ànima salvada

chi apemus, Bois faghide.

 Àter'amparu…

 

Fideles totu iscultade:

si salvare bos cherides,

solu a Maria curride,

si su perdonu chircades

gasie totu gosades

su regnu chi pretendides.

                   

 Àter'amparu no amus

         a Maria recurride.

 

                 *testo antico

 

“Pro sa sicagna”

 

In cust’ora disastrosa

de flagellos e sicagna

fecundade sa campagna

cun d-un’abba prodigiosa

Celeste mama amorosa

sos votos nostros cumpride.

 

         Àter'amparu no amus

         a Maria recurride.

 

Altre sestine

 

Maria rosa galana

Sole su piùs lughente,

Dae levante a ponente,

Dae sud a tramontana

Su nomen Tou ti giaman

               Sos devotos piùs ancora.

                                      Àter'amparu no amus

        a Maria recurride.

 

Maria ricu germinu

Su mundu Ti faghet festa

Salva dae ogni tempesta

Su popolu Tiesinu

Chi calpestat su terrinu

Ue abitat rica aurora

       Àter'amparu no amus

       a Maria recurride.